tusmo.iidhis.com

Warsaxaafadeedka uu soo saaray Ururka ayaa  waxaa lagu sheegay in ku dhaqanka shareecada Islaamka la’aanteed aan Soomaaliya loo heli karin Dowlad taaba-gasha, “Sidaas darteed, Xarakadu waxey si wayn u soo dhowaynaysaa una taageeraysaa go’aanka Barlamaanku ku gaaray ku dhaqanka Shareecada, 18/04/2009. Dhab ahaantii, waa arrin taariikhi ah oo lagu midaynayo Islaamka iyo dawladnimada, aduunyada iyo aakhirada. Waa maalin laga guuray qaab-dawladeedkii gumeysiga laga dhaxlay, loona guuray qaab dadka Somaaliyeed oo 100% Musklimka ahi ay leeyihiin”ayaa lagu yiri Warsaxaafadeedka uu soo saaray Ururka Al-Islaax.

Si loo taabageliyo ku dhaqanka Shareecada Islaamka ayuu Ururuka soo jeediyay dhowr qodob oo talo ah, kuwaasi oo kala ah:

In la sameeyo  hay’adda isku-dubaridka iyo is-waafajinta qawaniinta dawladda iyo Shareecada, Hay’daas oo aqoonyahannada qawaaniinta iyo diinta lagu kulminayo.

In culimada waa wayn ee dalka laga wada qaybgeliyo hawshaasi si looga fogaado inay u ekaato arrin kooxeed iyo mashruuc  gaaban oo siyaasadeed laga leeyahay.

Iyo In laga faa’idaysto khibradaha iyo waayo-aragnimada laga kasbaday dawladaha  Islaamka iyo cilmi-baarista arimahaas laga sameeyay.

“Ururka Al-Islaax wuxuu shacabka  Soomaaliyeed ugu baaqayaa inuu si buuxda u taageero dhaqangelinta Shareecada Islaamka, sidoo kalena khilaafaadka jira lagu xaliyo is waafaqsan Shareecada Islaamka”ayaa mar kale lagu yiri Warsaxaafadeedka uu soo saaray Ururka Al-Islaax.

“Ugu dambayntiina, waxaan Ilaahay ka baryaynaa inuu na gaarsiiyo dadka Somaaliyeed oo nabad ah, heshiis ah, xarigga diintoodana wada haysta. Waxaa kale oo aan Ilaahay ka baryaynaa dawlad iyo shacab ka midaysan wanaag samaynta iyo xumaan reebidda” ayaa lagu soo gunaanaday Warsaxaafadeedka uu soo saaray Ururka Al-Islaax oo uu ku saxiixnaa Guddoomiyaha Ururka Dr. Cali Baashi

Salaad Iidow Xasan (Xiis), Hiiraan Online

Comments (0)

Subscribe to this comment's feed

Name

Email

Website

Title

Comment

Add Comment